يامرحبا بالشباب. هذي تجربتي الشخصية لمقارنة بين سلكين RG6 و LMR400.
طبعاً كل السلكين طول 20 متر.
عشان اختصر عليكم الموضوع وعلى نفسي, انا كنت ناوي اسوي مقارنة دسمة وبالصور والأدلة والتفاصيل. لكن, الحق يقال, الLMR400 مايسوى فرق السعر! حيث أن متر الLMR400 ب 10 ريال, اما متر RG6 بريال واحد فقط.
كان عندي على جهاز الZTE MC801A1 شبكة STC القراءات على تردد N78
سلك RG6
إشارة الRSRP كانت -71~
إشارة الSINR كانت 28~
سلك LMR400
إشارة الRSRP صارت -66~
إشارة الSINR صارت 31~
بالنسبة للسرعة ماوجدت فيها فرق ابداً
كذلك البنق مافيه فرق ابداً. وأن كان يوجد فرق, هو في معدل الخطأ او بالعربي نسبة ماتحس فيها.
اذاً الجواب النهائي سلك LMR400 على طول 20 متر مايسوى تشتريه.
الي عنده تجربة غير تجربتي يشاركنا في التعليقات.
الله يعطيك العافيه
انا شخصيا اخذت لفتين rg6 طول 20 متر ووجهت الانتينا على البرج يبعد حدود 5 كيلو متر وتعبت من ضعف الاشاره تروح وتجي ويفصل الجيل الخامس … ونصحني شخص اغير الاسلاك وفعلا غيرت الاسلاك lmr400 بطول 20 متر واستقرت الاشارات واعطاني قراءات ممتازه ولايفصل الجيل الخامس والامور تمام اللي يقول مافيه فرق اعذرني والله ان الفرق كبير التجربة على راوتر هواوي برو 5
الله يعافيك أخوي. لاتقول انلعب علي بالسلك أجل؟
مع العلم انا لاحظت فرق صغير , و بالنسبة لي ماكان يسوى فرق السعر. يمكن سلكك القديم متقطع, مرتخي, ملتوي بشدة, جنبه اسلاك كهرب أثرت عليه, أو ربما بسبب بعد برجك؟ بس منطقيا سالفة بُعد البرج مالها دخل بنوعية السلك! عالعموم ربنا يبارك لك, و شكراً على تعليقك الجميل!
شكلك تاجر اسلاك rg6 وخربت عليك دعايتك المعذره منك اذا فيه طريقة احذف ردي علمني احذفه
اجل منطقيا بعد البرج ماله دخل بنوعية السلك ؟… ياصاحبي كلما بعد البرج قلت الاشاره وكل ماقلت الاشار قل نقلها عبر السلك واذا السلك ضعيف ضيع الاشاره…
عموما ياصاحبي الكايبل اخذتها جديدة باكياسها ولامهتريه ولاحولها اسلاك كهرب ورحت الان بحثت عن هالنوع من الكيابل rg6 ووجدت انها خاصه بنقل الصور عبر الاقمار الصناعيه وهي خاصه بالدشوش وليس لها علاقه بتاتا بجيل رابع وجيل خامس وانترنت …
ويبدو انك ساكن حول البرج بس جالس تجرب الكيابل وانا انصحك ترفع الراوتر من الدريشه او على السطوح وراح يعطيك نفس الاشارات مايحتاج كيبل ولاتجارب …
تسلم ياغالي. منب تاجر اسلاك لاتخاف ماخربت علي شي، و مايحتاج تحذف تعليقك ابداً. تجربتك مثريه وكلامك لاشك منطقي! انا نقلت تجربتي الشخصيه بإستخدام الكيبلين وفعلا البرج قريب من عندي، مثل ما قلت، ماهو بعيد قرابة الكيلو. ربما كان هذا السبب الي جعل الفرق ضئيل بالنسبة لي. وتحياتي لك اخي الكريم.
اتوقع الى يشتكي من اسلاك RG6 في نوع يجي اصلي دبل شيد قد يكون قريب من LMR300 مع اني اتوقع يكون الفرق كبير فرق السعر بين الاسلاك كبير جداً مو معقوله نفس الكفاءه يمكن للاطوال البسيطة يمشي الحال
يعطيك العافية
وهذي كانت تجربتي قبل كم يوم وحرصت تكون على نفس الظروف قدر الإمكان (نفس الوقت ونفس البرج ورقم الخلية وطبعا نفس الراوتر والأنتينا…الخ) وخليتهم في جدول 4 قراءات ل 4كيابل
الجدول من اليمين إلى اليسار يبدأ بالأنتينا ثم الوصلات وصلة وصلة ثم نوع الكيبل وطوله وينتهي بطرف الكيبل الثاني والوصلات ثم الراوتر آخر شيء في اليسار.
الوصلات وضعت أسماءها فقط بدون سالفة male and female عشان لا تلخبط ولا لها فائدة في موضوعنا هذا الان والمقصود ب (N and F) وصلات كيابل الدش االمعروفة الكبيرة والصغيرة،
وكايبل الدش أنا كتبت أصلي وعادي وفعليا كلهم أصلي لكن اثنين من محل كامرات مراقبة وواحد من محل الدشوش في طرف الحي.
قراءة ممتعة والحكم النهائي للقارئ الكريم
ملاحظة: هذي الوصلات اللي كانت متوفرة عندي واضطريت لها وأكيد لو خففت بعضها بتتحسن القراءة لكن تجربتي واقعية وبسيطة من الميدان على قولتهم.
ما شاء الله. ألاحظ التأثير كان في الرفع واضحًا. كثير من الخبراء ينصحون بأسلاك LMR أو 5D-FB خاصةً لأجل الترددات المرتفعة. أنا عن نفسي وجدت فرقًا ولكنه ما كان يستاهل فرق الـ 10 أضعاف في السعر عن الـ RG6. هذا والله أعلم، ولي ولكم التوفيق.
